Dipolog City – Nakaplagang wala nay kinabuhi ang usa ka houseboy didto gawas sa panimalay nga gitrabahoan niini sa may Martinez Village, Barangay Turno, dakbayan sa Dipolog.
Naila ang biktima nga mao si Artemio Delana, alyas “Tadong” 55 anyos, minyo ug sinaligan sa panimalay ni Joeven “Dennis” Saile.
Nasayran nga nag-inusara lang sa maong panimalay ang maong biktima kay nalarga sa Sugbo ang iyang mga agalon.
Ulahing kining nakit-an buhi sa mga silingan nianang pang gabii sa adlaw’ng Sabado nga lango sa ilimnong makahubog.
Gidugang pa sa mga silingan nga pasado 1:40 sa hapon ilang gisusi ang biktima human wa na igkita ug wa nigawas aron mokaon sa pamahaw ug pani-udto apan ilang nadiskobrihan kilid sa balay nga nagkulob na sa may kanal ug wa nay kinabuhi hinongdan nitaho sila sa buhatan sa kapolisan.
Sa inisyal sa imbitigastion sa homicide section sa Dipolog PNP ang biktima gituhu-ang nadakin-as sa dangog nga gitumban niini hinongdan nabunal ang ulo sa sementadong kanal ug nakulob sa napondong tubig ug nalumos.
Gidala na sa D’manc Funeral home ang patay nga lawas sa biktima ug girekomendar sa kapulisan nga ipailawom kini sa postmortem examination aron masiguro ang hinungdan sa kamatayon niini.
