Bukidnon – Hugot nga gikondena sa Kalumbay Lumad Organization – Northern Mindanao ang hulga ni Pangulong Rodrigo Duterte nga iyang ipabomba sa militar ang mga eskwelahan sa mga Lumad sa Mindanao nga gigamit matud pa sa mga NPA sa pagtudlo sa subversion, komunismo ug kung unsaon magrebelde sa gobyerno.
Sa interview sa RMN Malaybalay ngadto kang Datu Jomorito Goaynon, ang Chairman sa Kalumbay Lumad Organization Region 10 gibutyag niini nga sakit alang sa ilaha ang hulga sa pangulo.
Matud niya nga ang 60 ka mga tulunghaan sa rehiyon inisyatiba nila uban sa grupo nga Kalumaran Mindanao ug Kalumbay nga makapabarug ug kaugalingong tulunghaan tungod kay wala sila naabot sa gobyerno.
Ila unta daw nga gipanawagan nga protektahan kini sa pangulo apan ang problema karon gihulga na hinoon.
Gidepensa pa ni Goaynon nga ang maong mga tulunghaan gitukod aron lamang makakat-on ug basa ug ma-edukar ang mga lumad.
Samtang gidepensa usab sa Armed Forces of the Philippines ang mao nga hulga sa Pangulo.
Sa interview sa RMN Malaybalay ngadto kang AFP Spokesperson B/Gen. Restituto Padilla gibutyag niya nga naila na si Pangulong Duterte sa iyang pagka-isog manulti apan humok usab kini ug kasing-kasing ug ang kaayuhan sa kinabag-an maoy gitinguha.
Punto lang matud pa sa pangulo nga adunay mga tulunghaan nga dili accredited sa Department of Education ug gitudlo ang kontra sa mga gihimo sa gobyerno.
Gidugang pa ni Padilla nga imbes mga hustong values ug pagmahal sa gobyerno ang itudlo gitudluan na hinoon kini sa pagka-rebolusyonaryo nga usa ka sayop ug dili angayan nga magpadayon.
Mahinumduman nga gipahimangnuan pa sa pangulo ang mga Lumad nga mubiya sa area gumikan bombahon sa Philippine Air Force (PAF) ang ilang mga istrukturang iligal nga gipadagan o gidumala sa mga rebelde.
