Magpadayon ang probinsiyal nga kagamhanan sa Lanao del Norte sa pagpalambo sa paugnat sa kusog, ilabina sa triathlon, aron dasigon ang partnership sa matag munisipyo nga ipa-usbaw ang Sports Tourism sa lalawigan.
Kini human ang malampuson nga pagpahigayon sa Lanorteman Leg 2 niadtong Septembre sa lungsod sa Kauswagan nga gisalmotan sa kapin 300 ka mga triathletes gikan sa nagkalain-laing dapit sa Pilipinas, lakip na mga bisitang triathletes gikan sa mga nasud sa Australia ug Spain.
Matud pa ni Lanao del Norte 1st District Congressman Khalid Dimaporo, mao kini ang maayong higayon aron ipakita ang panaghi-usa sa mga residenteng Kristiyan ug Muslim, kinsa malinawon nga nagpuyo sa lalawigan sulod sa mga katuigan.
Miingon si Dimaporo nga dili lamang pagsalmot sa paugnat sa kusog ang tumong sa maong kalihukan apan usab ang pag-selebrar sa panaghigalaay nga namugna sulod sa lima ka tuig nga nag-host ang Lanao del Norte og triathlon.
Napakita usab kini, matud pa, sa probinsiya nga usa kini sa malinawong dapit, gawas sa pagdasig sa mga residente nga magbaton og baskog nga istilo sa kinabuhi o healthy lifestyle.
Lakip si Cong. Dimaporo ug ang iyang igsoong babaye’ng si Aliya, kinsa maoy provincial administrator sa buhatan sa ilang inahang si Governor Angging, ang misalmot sa triathlon leg 2.
Usa ka adlaw sa wala pa kini gipahigayon, gidala ang mga atleta ngadto sa mga sikat nga tourist spots sa probinsiya aron ilang masinati ang hospitality o pagkamaayong tawo sa mga residente.
Ang Lanorteman final leg ipahigayon sa Disyembre karong tuiga sa lungsod sa Sultan Naga Dimaporo. (Divina M. Suson) -30-
Photo Courtesy: Lanao del Norte Provincial Information Office
