General Santos City—Dungan sa subling pagbalik sa Oplan Tokhang nga programa ni Pangulong Rodrigo Duterte sa pagsumpo sa iligal nga droga, gipaniguro sa Gensan City Police Office (GSCPO) nga walay tawhanong katungod nga malapas ang kapulisan sa dakbayan sa pagpatuman sa nasampit nga programa.
Si Police Chief Inspector Jovenson Bayona, Spokesperson sa Gensan City Police Office nagbutyag nga nag unang kamanduan ni Gensan City PNP Director Police Senior Supt. Romeo Ruel Berango ngadto sa mga Chief Of Police sa walo ka mga Police Station sa Gensan ug sa mga Tokhangers nga sundon ang guidelines sa pagpatuman sa Oplan Tokhang.
Usa sa mga guidelines mao ang pagpatuman sa programa sa adlaw lang sa Lunes ngadto na sa Byernes alas 8:00 sa buntag ngadto na sa alas 5:00 sa hapon; angayan nga nagsul-ob ug uniform ang mga tokhangers, dapat sab nga dunay presensya sa Media ingon man religious sectors og labaw sa tanan dili pwedi nga musulod sa balay ang mga tokhangers.
Pinaagi niini malikayan ang mga reklamo sa human rights violation batok sa kapulisan. Hinuon dinhi sa Gensan wala may natalang kaso sa human rights violation atol sa unang hugna sa pagpatuman sa programang Oplan Tokhang.
Kahinumduman nga niadtong Lunes pormal nang gisugdan ang pagbalik sa maong programa sa kapulisan.
