General Santos City—Human sa mga pagpang-ataki sa NPA sa ubang lugar sa Mindanao, nagpatuman ug mas hugot nga seguridad ang militar nga nakabase sa Sarangani Province.
Tumong niini aron nga dili maisahan sa walhong pundok nga naglihukan sa kabukiran sa probinsya.
Sumala ni 1st Lt. Ian Dollente, Executive Officer sa Alpha Company nga nakabase sa Sarangani Province nga dili nila tugtan nga makaporma ang maong grupo ug makahimo ug pagpang-ataki sa mga lugar ilawom sa ilang AOR.
Gikumperma usab ni 1st Lt. Dollente nga sa karon gamay nalang gyud ang nahibiling ihap sa mga miyembro sa NPA nga nagalihukan sa ilang area.
Ang mga nahisgutan remnant sa mga nahibiling miyembro sa Guerrilla Front 71 nga naglihukan gihapon sa kabukiran sa probinsya.
Sa karon way puas ang ilang pagmonitor sa maong grupo aron sa ingon mapugngan ang unsa man galing nga pagpanabotahe nga ilang himuon.
