Himoon sa Budapest sa Hungary ang ika-52 nga International Eucharistic Congress kon IEC sa tuig 2020. Gipahibawo kini ni Pope Francis sa iyang 12-minuto nga recorded message gikan sa Vatican ug gipakita atol sa Statio Orbis o closing mass nga gihimo kagahapon sa South Road Properties ug gitambungan ug di momenos usa ka milyon nga mga katoliko.
Nihugyaw ang mga delegado gikan sa Hungary sa pahibawo sa Santo Papa nga sila ang sunod nga host sa IEC upat ka tuig gikan karon. Gipasalamatan usab sa Santo Papa ang iyang representante nga si Charles Maung Cardinal Bo, Manila Archbishop Luis Antonio Cardinal Tagle, Cebu Archbishop Jose Palma, Archbishop Piero Marini sa IEC Pontifical Committee, ug ubang mga nitabang aron magmalamposon ang IEC sa Cebu City.
Gitubag usab ug pasalamat ni Peter Cardinal Ebdo sa Hungary si Pope Francis tungod sa pagpili sa ilang nasud nga sunod nga host sa IEC ug gidapit ang mga nanambong sa misa nga mouban usab kanila sa pagsaulog sa kalihukan sa ilang nasud sa tuig 2020.
