Davao City – Ipasubay ni Tibungco Barangay Kapitan Merjade “Buddy” Calvo sa iyahang mga Barangay Health Workers kung kinsa man ang mga buros o buntis sa ilahang Barangay subay kini sa napalgang patay nga bag-ong himugsong batang babaye sa basurahan kagabie atbang sa may palengke.
Duda si Calvo nga posibleng sa maong area lamang usab ang responsable sa paglabay sa maong baby kinsa naukayan sa usa ka basurero.
Matud ni Calvo nga nagtinabangay sila uban ang Rivera Funeral Homes ug ang lokal nga panggamhanan sa galastuon sa pagpahiluna sa gilabay nga bata.
“Ang akoang panawagan og kung kinsa man ang ginikanan atong bataa nga gipasagdan diha ang patayng bata nga gilabay diha sa basurahan unta makonsensya ug magpatim-aw ka kung naa man kay problema istorya ta sa barangay kay aron matabangan nato ug atleast man lang mapahiluna ang bata ug mahiluna sab ka,” sumala ni Calvo.
Gibutyag ni Bunawan PNP station commander Noel Villahermosa nga kamot lamang sa maong suspek ang naklaro sa CCTV footage bantang sa gilabayang basurahan.
Busa naningkamot karon ang kapulisan sa pagpangalap og mga posibleng adunay impormasyon o nakasaksi sa paglabay.
Kasong infanticide o abortion ang mamahimong atubangon sa inahan nga responsable sa krimen.
RadyoMaN Aimee Guinita
