Roxas City, Capiz – Igapasaka na sa korte ang kaso nga murder kag attempted murder batuk sa duha sa tatlo ka mga suspek sa pagpatay kay anay Punong Barangay Elvis Asis sang Barangay Lawaan, Roxas City. Ini ang nangin rekomendasyon sang Roxas City Prosecutor’s Office matapos ang ginpagwa nga nga joint resolution sang piskalya nga napetsahan Agosto 28, 2018. Base sa napulo ka panid nga joint resolution nakitaan sang nagakaigo nga balasehan ukon probable cause ang reklamo ni Punong Barangay Jocelyn Asis ang tiayon sang nagtaliwan nga kapitan, nga pasakaan sang kaso sanday Joey Bacus alias Tata sang Sitio Manga, Barangay Bakhaw, Mandurriao, Iloilo City kag isa ka John Doe.
Samtang sa amo man nga resolution, ginbasura naman ang kasubong man nga mga reklamo batuk sa kay Rogelio “Nonoy” Buaron sang Barangay Poblacion Ilawod, Panay, Capiz bangud sa kakulangon sa ebidensya kag probable cause. Suno sa Piskalya, wala sang may nakita nga ebidensya batuk sa kay Buaron kag indi maathag ang iya partisipasyon sini sa krimen kun basehan ang testimoniya sang mga testigo nga ginatudlo ini nga nagmando sa iban pa nga mga akusado agud patyon si Asis.
Ang nasambitan nga joint resolution ang pirmado nanday Assistant State Prosecutor Reynaldo Delantar Jr., Associate City Prosecutor Ronald Asong, Assistant City Prosecutor Babette Bolido; gin-review ni Assistant City Prosecutor Eduardo Delfin kag aprubado ni City Prosecutor Erwin Ignacio. Sa madumduman nga nagluntad ang pagluthang kag pagpatay kay anay Punong Barangay Elvis Asis sadtong Abril 27 sini nga tuig samtang nagasakay ini sa motorsiklo nga ginamaneho ni Joselito Casila kun sa diin napilasan man ini. Ginatudlo diri ni Casila nga si Bacus kag upod sini ang nagpangamot sa pagtiro sa anay kapitan gamit ang .45 kalibre nga armasluthang.
Base sa reklamo ni Jocelyn Asis, madugay na nga mag-abyanay ang bana sini nga si Elvis kag si Buaron bangud sa gina-alegar nga illegal number’s game nila nga duha. Suno kay Jocelyn nga pila ka adlaw antes nagluntad ang krimen, mga mga pagsabtanay sa cellphone sa tunga sang iya nga bana kag ni Buaron kun sa diin nagpanindugan ang anay kapitan nga magbalik sa operasyon sang illegal number’s game bangud konektado na ini sa legal nga operasyon sang Small Town Lottery ukon STL, bilang supervisor sa first district. Nahibaluan man nga si Bacus nga isa man sa mga suspek ang nagserbi man bilang driver ni Buaron kag nangin runner na sang STL operation ni Asis antes nagluntad ang krimen.
