Davao City – Buot karon sa ginikanan ni Cherishly Ann Bansag, ang estudyanteng nasunog-patay sa Calinan, Davao City nga manubag ang tulunghaan labot sa gidangatan sa iyang anak ug aron ilang ma-angkon ang ilang gisinggit nga hustisya.
Sa interbyu sa DXDC RMN Davao kang Rutchie Bansag, inahan sa biktima, gisaysay niini nga adunay mga istorya nga gi-briefing ang mga estudyante ug mga maestro sa tulunghaan labot sa nahitabong insidente.
“Daghan kaayong mga istoryang naabot sa amoa. Dapat wala ninyo gi-briefing ang mga estudyante, mga maestro. Nagpagawas unta mo’g statement aron dili mudugang ang kasakit sa amoa isip ginikanan,” saysay sa inahan.
Samtang saysay usab ni Casiosly Bansag, amahan sa biktima nga aduna gayoy kakulangon ang maong eskwelahan rason nga angay nila kining atubangon.
“Matubag nila ang ilang dapat matubag ug makita nila ang mga mali nga nabuhat kay mao na ang kakulangon gyud nila,” saysay ni sa amahan.
Karong adlawa lamang sa dihang hingpit nang gilubong ang grade 9 student diin ubay-ubay katao ang miduyog nga aduna pay naka printa sa ilang suot nga sinina nga ‘justice should prevail’.
Kahinumduman nga nahitabo ang insidente sa dihang nasunog ang costume sa biktima nga gamiton sa usa ka search pageant sa eskwelahan niadtong Oktubre 25, 2019.
RadyoMaN Kirby Manzon
