Santos City—Nagbangutan ug nangayo ug hustisya si Ghaga Robles nga taga Changco Village, Barangay Bawing, Gensan kapuyo sa biktimang si Jimmy Lawas, 49 anyos kansa una nang nakaplagang patay sa baybayon nga bahin sa Sitio Kindat-A, Barangay Kanalu, Maasim, Sarangani Province, Kagahapong adlawa.
Sumala ni Ghaga nga walay kasing-kasing ang mipatay sa iyang Live-in partner. Nasayran nga puno ug samad dinunggaban ang lawas sa biktima ug nakabaklid pa ang duha ka kamot niini.
Ayha nakaplagan ang patayng lawas sa biktima sa pangpang, gidagit matud pa kini sa dili muobos upat ka mga tawo didto mismo sa ilang panimalay niadtong nakalabayng gabie.
Segun sa saysay ni Ghaga, dunay miabot sa ilang balay nga usa ka fortuner, duha ka suspek ang milugos ug mideklara nga ilang dad-on ang iyang live-in partner tungod duna kini syay warrant of arrest.
Gisakay sa mga suspek ang biktima sa sakyanan dayon miparatil ug padagan padulong sa area sa Maasim. Gisuwayan pa ni Ghaga ug gukod ang sakyanan apan wala na gyud niya kini maabtan tungod sa kusog nga pagpadagan sa mga suspek.
Nakurat nalang kini dihang pagkabuntag iyang nasayran nga nakaplagan ang iyang bana sa Maasim.
