Davao City – Hustisya ang singgit karon sa pamilyang Estellore atol sa nahitabong mangilgig nga pagpatay kang Mercidita Estellore sulod sa iyang karenderya sa may Lastima Compound, Matina ning siyudad diin gibana-banaang anaa na sa tulo ka adlaw nga patay ang biktima una kini napalgan.
Sa interview ni RadyoMaN Paul Canono kang Harold Estellore, pag umangkon sa biktima, nga daw dili na mahulagway ang nawong sa iyang iyaan gani gihulagway niini ang suspek nga sama sa usa ka hayop tungod sa brutal nga pagpatay sa 43-anyos nga babae.
Kung si Harold ang pasulti-on, wala kini mahuna-hunaan nga kaaway sa iyang iyaan mao nga blangko pa gihapon kini sa kung kinsa ang suspek nga responsable sa maong pagpatay.
Dugang niini nga base usab sa imbestigasyon sa kapulisan positibong nawad-an ang iyang iyaan og kwarta ug mga alahas, gani usa sab sa mga anggulo nga ginatan-aw karon sa otoridad nga tulis ang motibo sa krimen.
Matod ni Harold, kinsa mao usab ang naglihok sa mga papeles sa patay’ng lawas sa iyang iyaan, nga dalaon ang patay’ng lawas ni Mercidita sa Saranggani kun asa kini lumlupyo.
RadyoMaN Abi Bibera
