General Santos City—Hustisya ang singit karon sa mga kinikanan sa 25 anyos nga si Elton John Pesito, nga nanimuyo sa Upper Matibay, Barangay San Isidro ning syudad kansa una nang gipusil sulod mismo sa ilang panimalay niadtong nakalabayng gabie.
Matud sa amahan ug inahan sa biktima nga silang si Tessie ug Elesio Pesito nga dili makatarunganon ang gihimong pagpatay sa ilang anak kansa yano lang nga gipusil sulod sa ilahang panimalay samtang atul na unta sila nga manihapon.
Sumala pa sa inahan nga kalit matud pa kaayo ang panghitabo, diin misulod ang duha ka mga suspect sa ilahang balay ug nanglisik matud pa ang mga mata niini samtang naga-panguta sa biktima nga si Soi-Soi kung siya ba si Boyet.
Apan sa dihang mitubag ang nahisgutan nga dili siya si Boyet giduolan matud pa sa mga suspect ug gipamugos nga siya gyud mao si Boyet ug didto gipusil sa ulo og gitiwasan pa gayud samtang natumba na ang nahisgutan.
Dugang pa sa inahan sa biktima nga bisan siya ang hapit usab gipusil sa mga suspect human nga gipugnan niini nga makasulod sa ilahang panimalay hinungdan nga sa dihang naka-dungog kini ug buto midagan na kini palayo sa ilahang balay.
Matud sa inahang nga yano lang milakaw palayo sa ilahang balay ang mga suspetsado ug misibat palayo.
Samtang gikabutyag usab ni Upper Matibay Chairman Jennie Ann Dillo nga usa ka buotan nga bata ang ilahang pagka-ila sa biktima ug wala sila nasayod nga aduna kiniy nakabingkil.
Samtang wala man usab matud pa kiniy record sa ilahang purok nga na-involve sa kagubot ug droga ang nahisgutang biktima hinungdan nga nahibulong sila nganong gipatay kini sa mga suspect.(Jordan Britos)
