Davao City – Nanawagan karon ang inahan ni Laurence Siarot, 18-anyos, nga namatay human nga nakuryentehan niadtong Martes, Oktubre 8, 2019 ngadto sa mga responsable sa kamatayon sa iyang anak nga angay kining manubag.
Sa interbyu sa DXDC RMN Davao kang Novelyn Siarot, gibutyag niini nga aduna gayoy pagpabaya nga nahitabo ug kakulangan sama na lamang sa mga warning ug precautions sa maong area ug wala usay nakatawag gilayon sa central 911 aron marespondehan ang iyang anak.
“Nanawagan ko sa mga tawo nga responsable ani, sa ilang mga lapses. Kay nakita gyud namo nga walay mga warning device or mga precautions nga gibutang nga naa diay problema ana,” saysay ni Novelyn.
Gibutyag niini nga aduna nay mga nakuryentehan sa maong traffic light sa Barangay Panacan apan sa iyang anak ang insidente nga miresulta gayud sa kamatayon.
“Kung dili na tagaan og aksyon, daghan pa kaayo nga mga bata, mga estudyante, mga residente nga maapektuhan diha,” segun niini.
Sa report, gibitbit sumala pa sa biktima ang iyang sapatos ug milusob sa baha apan pag-agi niini duol sa usa ka traffic light, kalit na lamang kining nakuryentehan ug natumba.
Andam usab nga mo-file og formal complaint ang inahan sa biktima sa mga adunay responsibilidad sa insidente.
RadyoMaN Kirby Manzon
