General Santos City–Hustisya ang gustong maangkon sa pamilya sa biktimang napatay nga si Christopher Cayang, hingkod ang panuigon, residente sa Prk. Datal Kasila sakop sa Brgy. San Jose, Gensan kansa gipusil patay sa mga suspek pasado alas 12:00 sa udto sa nasangpit nga lugar.
Sumala pa sa asawa sa biktima nga si Wilehada Cayang nga sa wala pa gipusil ang iyang bana nagkural pa kini sa iyang luna nga gihatag sa iyang tiyo nga tag-iya usab sa yuta nga gibantayan niini apan dihang mopauli na unta ang nasangpit uban ang iyang mga ig-agaw kalit lang matud pa sila gi-atangan sa mga suspek.
Pipila ka higayon matud pa gisuwayan ug pusil sa mga suspek ang biktima apan wala mibuto ang armas rason nga nakahimo pa kini ug ilog sa armas sa mga suspek ug natigbasan pa niini ang usa ka kauban sa mga responsible.
Tungod sa daghang mitabang sa biktima wala na niini nadepensahan ang iyang kaugalingon ug wala usab nakatabang ang mga kaubanan niini gumikan kay gipangpusil usab kini sa mga suspek asa igo usab ang usa niini ka ig-agaw nga gidala sa ospital lang sa medikasyon.
Nakaangkon ug igo pinusilan sa agtang ug dughan ang biktima nga misangko sa iyang kamatayon samtang paspas misibat ang mga suspek palayo sa lugar asa ang usa gidala usab sa ospital human nga natigbasan sa biktima.
Away sa yuta ang gilantaw nga hinungdan sa pamilya kung asa ilang nailhan ang nagpapatay sa nasangpit.
Samtang pagbutyag usab ni Koy Bilal, ig-agaw sa biktima nga kauban niini niadtong higayona nga wala sila nagdahum nga dunay miatang kanila sa ilang pagpauli ug nahitabo ang wala niini gilauman.
Nagtuo usab ang nasangpit nga yuta ang hinungdan sa pagpusil sa iyang ig-agaw gumikan kay usa ka gabie dihang wala pa gipusil ang biktima giadtuan kini sa mga suspek ug giingnan nga human na matud sila gibayaran sa nagpapatay sa biktima.
Naglaum na lamang ang kabanay sa biktima nga tabangan sila sa kapulisan nga madakpan ang mga suspek aron maangkon ang hustisya sa ilang ig-agaw nga gipusil patay . (RV)
