Gipahinumduman karon sa Department of Agriculture Region 10 ang publiko kalabot sa hustong pamaagi sa pagbuhi ug kahayupan ilabina ang baboy.
Sa interview sa RMN Malaybalay ngadto kang Juliet Araos, ang chief sa DA-10 regulatory division gibutyag niini nga kinahanglang higpit ang mga backyard owners ug dili basta-basta magpasulod ni bisan kinsa ug sundon ang pamaagi sa pagbahog sa mga binuhing baboy nga kinahanglang mga de-kalidad nga mga pagkaon ang ipakaon.
Kinahanglan usab daw nga ma-vigilante ug obserbahan ang mga gipangbuhing mga baboy kon kini wala ba nagkasakit.
Samtang nanawagan usab si Araos ngadto sa mga mag-uuma sa probinsya sa Bukidnon nga suportahan sila sa ilang mga lakang nga gihimong aron malikayan ang pagsulod sa African Swine Fever sa rehiyon.
Ilabina nga istrikto ang mga kuwarentinas sa karon diin gihimo kini alang sa kaayuhan sa tanan.
Gi-aghat usab ninii ang mga namuhi ug kahayupan nga mutaho gilayon sa DA technicians ug local veterinarians kung adunay mga namatikdan nga kadudahang panghitabo sa ilang mga binuhing kahayupan.
