General Santos City—- Gikumpirma ni Ben Sumog-uy, tigpamaba sa I-Defend nga aduna silay lunang gikalot sa area sa Alcantara Ranch sa paghinaut nga makita bisan ang patay’ng lawas ni Philip Bacudo, 19 anyos nga taga-brgy. Calumpang human ang kapin bulan niining pagkawala.
Sumala niya nga adunay mitawag sa amahan ni Philip nga si Bernard nga sumala pa adunay gidala sa maong dapit ug gilubong.
Rason nga midangop sila sa korte aron nga makapangayo ug pagtugot nga makalot ang sumala pa lugar kung asa gilubong si Philip, apan pakyas matud pa nila nga kini makit-an.
Dugang pamahayag ni Sumug-uy nga gipaniguro ni Police Chief Inspector Joel Fomokao, ang labaw sa Investigation Detection and Management Branch (IDMB) nga dili sila mu-undang sa pagpangita kang Bacudo.
Una na usab nga gibutyag ni Police Senior Superintendent Romeo Ruel Berango, acting City Director sa Gensan City Police Office nga iyaha ng gihatagan ug direktiba ang tanang mga Police Station sa dakbayan nga ipaskil ang hulagway ni bacudo alang sa mga posibleng nakakita o naka-ila.
Gani bisan sa gawas sa dakbayan, nangayo na sila ug tabang sa pagpangita kang bacudo alang sa mga posibleng nakakita sa nahisgutan.
