Davao City – Wala nagkulang ang gobyerno diha sa pagpasabot ug pagpahinumdom sa tanan nga batukan ang coronavirus disease kun COVID_19 apan gumikan lagi sa kagahi sa ulo sa mga Pilipino sa pagsunod sa pahimangno ug guidelines, walay pag-ubos apan misaka pa man gani hinoon ang kaso sa matag adlaw.
Busa, hangyo karon ni Integrated Bar of the Philippines (IBP) Davao City Chapter President Atty. Maceste Uy sa publiko nga magpuyo sa panimalay ug dili mugawas haron ang COVID-19 mawad-an og kahigayonan nga mokaylap pinaagi sa gitawag nga ‘local transmission mode’ sa uban buwahan mahuman na ang krisis nga mihampak sa nasud ug sa entero kalibutan.
Matud ni Uy, gibuhat na tanan sa kagamhanan aron mapukan ang pandemic ug aron malikayan ang pagkarabanit og maayo sa ekonomiya sa Pilipinas apan tungod kay nagpasulabi gihapon ang maut nga kinaiyang pagkasupakero sa mga Pilipino, lagmit molungtad pa’g taudtaud ang maong makamatay nga virus.
Gipananglitan karon ni Uy ang ubang mga nasud sama sa Vietnam ug Taiwan nga sa hamubo nga panahon lamang, gipukan nila ang COVID-19 diin ang katawhan walay balibad nga nagkooperar ug luag nga mituman sa mga palisiya nga istriktong giimposar sa gobyerno sama sa pagpondo diha sulod sa panimalay lamang sulod sa mandatory quarantine and containment regulation.
Kung luag sa kasingkasing sa mga Pilipino ang pagsagop sa kinaiya sa katawhan sa naasoy nga mga nasud, nan sama sa mga modelong kanasuran, hayan mapildi ra sa gobyerno ang kaaway nga virus ning giyera gani daku ang purohan nga mahuman ra unya ang atong pag-antos ug tumang kalisod nga gisagubang karon sa mga residente sa nasud mugna ning partikular nga pandemic.
RadyoMaN Joel Viray
