Davao City – Pabor si Davao City Association of Barangay Captains (ABC) President ug Bankerohan Barangay Chairman Edgar Ibuyan, Sr. nga imbestigahan si Department of Health (DOH) Secretary Francisco Duque III.
Matud ni Ibuyan, pinaagi ra sa imbestigasyon mapagawas ang kamatooran kalabot sa pasangil nga adunay kakulangon sa liderato, katakos ug kapasidad si Duque nga buntogon ang COVID-19.
Matud sa Office of the Ombudsman, bout nilang patubagon si Duque ug pipila ka mga kadagkuan sa health department sa mga seryosong alegasyon sa overpriced nga pagpamalit og kagamitan alang sa mga medical frontliners, delatadong benepisyo alang sa mga anaa sa maong sektor ug kakulang sa liderato, direksyon ug klarong data management ingon man national approach versus pandemic.
Busa, aron malimpyohan ang pangalan ni Duque gikan sa isyu sa kurapsyon ug incompetence, makataronganon lamang nga mopailawom siya ug mga kakaubanan sa DOH sa makuting imbestigasyon, dugang sa kapitan.
Dili pa masulti ni Ibuyan kon wala ba gayu’y nahimo ug nga walay hibangkaagan si Duque sa pakigbatok ning makalilisang nga pandemic.
RadyoMaN Joel Viray
