iFM Comfort Room,
Palihug tagua lang ko sa pangalan nga Anabella. Biyuda nako sukad nga namatay ang akong bana nga sundawo.
Nahibilin nako ang amung tulo ka buok anak. Dagko na ug nagpasalamat ko sa kaayo sa Ginoo nga bisan sa kapait nga mag-inusarang magpadako nila, nakalahutay ra jud. Mura bag gigiyaan gihapon ko sa kanhi nakong bana.
Lima na man sad katuig ug nakamove on naman ming tanan. Naa gihapoy mga panahon nga mamingawan ko sa akong bana, sa iyang katawa ug mga pasiaw. Bisan baya muana sila nga duol kaayo sa temtasyon ang mga lalaki ning mga ingon ani nga klase sa trabaho, akong nailhan akong bana nga pwerteng buotana. Family-oriented kaayo ug pinangga kaayo niya ang akong mga anak.
Karun lang nga tuig iFM Comfort Room, naay nag-abang sa amua. Taguon lang natu sa pangalan nga Eddie. Naa man gud nay bakanteng lugar sa ubos sa amung tugkaran, akong gipatrabahu ug gipahimuan ug abangan nga mga kwarto. Mao nalang ni ang akong source of income aside sa akong madawat sa trabaho sa akong bana kaniadto. Wala naman sad koy lingaw. Akong duha ka anak babay, nanarbaho na. Akong kinamanghuran, nagtungha na sa college. Puros mga busy ang akong mga bata, tigdugayan pa mauli.
Sa amung panagkaila ni Eddie, wala tuyua nga makauyon ko. Kami ra man gud ang magkasturyaanay sa panahon nga ako nalang ang mabilin sa balay. Siguro tungod pod sa kamingaw. Naay nahitabo namu ni Eddie. Mura na mig uyab karun but wala pa jud miy pormal nga relasyon.
Nahibawo ko nga naibog si Eddie diri nako maong ako siyang gipasabot nga unhan usa nako ug ingon ang mga bata arun nga dili sila makurat. Pero akong problema, nakamatikod na siguro ang mga bata. Dili man jud sila mutagad ni Eddie nuon.Wala jud ko magsulti nila bahin ni Eddie pero makabantay ko nga dili ra nila panumbalingon si Eddie kung mag-abot sila sa silong. Hangtud nga kausa, nangutana ang akong anak kinamaguwangan kung nganung naa na si Eddie makit-an niya usahay musakay. Nagpasumangil ra ko nga nagpatabang ko paayo sa suga sa balay. Pero akong gisalikway ang hunahuna sa akong anak nga naa miy relasyon ni Eddie.
Karun nagpabiling tagu amung relasyon sa akong mga anak. Problema sad nako, kay aduna man gud nay anak daan si Eddie pero naa sa iyang kaipon sauna.
Unsa man akong buhaton arun madawat si Eddie sa akong mga anak ? Mas maayo ba nga magpabilin nalang ko nga single kung kana nga murag dili tugot akong mga anak bahin ni Eddie ?
Tambagi intawon ko.
Inyong suking tigpaminaw,
Anabella
*** Gusto ba kang makadungog sa mga tambag para sa atung letter sender ? Paminaw lang sa programang iFM Comfort Room kauban inyong DJ Maikee Gol (FB: Maikee Gol Ifmcebu) matag 1-3PM (Mondays-Saturdays). Please also visit our official Facebook Fanpage www.facebook.com/ifmcebuofficial/
Para sa mga gustong mamahimong letter sender , share your stories sa ifmcomfortroom@gmail.com
Daghang salamat. Sa sunod na pod nga sugilanon, idol !
