[image: crime-scene-body-outline-murder-web-generic.jpg]
Dead on arrival sa St. Elizabeth Hospital ang ulahing biktima sa pagpamusil patay sa dakbayan nga usa ka Aubrey Abejaron, 29 anyos, single ug self-employed nga residente sa Atis Street, Barangay Dadiangas West ning siyudad Myerkule alas-7:10 sa gabie sa may Sampalok St. corner North OsmeƱa sa maong barangay.
Base sa imbestigasyon sa Pendatun Police Station nagsakay matod pa ang biktima og traysikel apan pag-abot sa lugar nga nahitaboan sa krimen gibabagan sa motorcycle riding gunman ang gisakyan sa biktima og gipusil hinungdan nahagbong.
Gisundan og pusil ang biktima sa laing nagsunod nga motorcycle riding gunman igo sa iyang kalawasan gamit ang wala matino nga kalibre sa armas.
Nakigpinusilay sad ang tulo ka pulis nga nag-beat patrol duol sa area apan wala mapurohan ang mga suspek nga nakasibat human sa panghitabo.
Gilayong gidala sa mga pulis ang biktima ngadto sa ospital apan gibakwian gihapon sa iyang kinabuhi bandang alas-9:20 sa gabie base sa kumpirmasyon sa attending physician nga si Dr. Abraham Mercado.
Nakarekober ang kapolisan og 12 ka fired cartridge case sa .45 pistol, walo ka fired cartridge sa 9mm pistol ug usa ka dislocated slug sa wala matinong kalibre sa armas gikan sa crime scene.
Kahibaluan nga magulang ang biktima sa usa ka drug suspect nga nadakpan sa buy-bust operation niaging semana ning bulan sa Setyembre giila sa pangalang Kirby Abejaron.
Padayong gipalawman sa kapolisan ang motibo sa pagpamusil patay sa nasangpit nga biktima.
