General Santos City–Dili karnaper ang iyang igsuon, kini ang gihingusgan ni Stephanie, igsuon sa gialigarang karnaper nga si Jeffrey Lopez, hingkod ang panuigon nga taga Tampakan, South Cotabato kansa napatay sa gipahigayong hot pursuit operation sa kapulisan niadtong nakalabayng adlaw.
Matud ni Stephanie nga may deperensya sa panghuna-huna ang iyang igsuon. Milakaw kini gikan sa ilang panimalay niadtong Abril 25 ug Abril 27 na nila nasayran nga anaa kini sa balay sa ilang Paryente sa Polomolok.
Ila una kining gipasagdan tungod sila sayod nga mouli ra kini sa ilang balay apan natingala nalang sila dihang nakadawat ug report nga napatay sa operasyon sa kapulisan ang iyang igsuon.
Gihingusgan ni Staphanie nga walay pusil ug dili usab makamao nga mo-drive ug motor ang iyang igsuon.
Gikondina usab niini ang kapulisan sa Polomolok, nganong gipusil patay gyud ang iyang magulang, unta sumala pa ila unang gi-estorya tungod kahibalo man kining maminaw.
Dugang pa ni Stephanie nga sakit kaayo sa ilang buot nga may deperensya na gani sa panghuna-huna ang iyang magulang yano pa kining gipusil lima ka higayon nga hinungdan sa iyang kamatayon.(TAS)
