General Santos City–Gikumpirma ni Police Colonel Joel Limson ang Provincial Director sa South Cotabato Police Provincial Office nga migamay na gayud ang mga rebeldeng New People’s Army kon NPA sa South Cotabato human nga daghan na ang misurender sa sabakan sa gobyerno dala ang ilang mga armas.
Sumala pa ni Limson nga anaa pa gihapon ang presensiya sa mga rebeldeng grupo sa ubang lugar sa South Cotabato nga nagtaguan apan gamay nalang dili parehas kaniadto nga kada adlaw dunay mga makit-an nga mga rebeldeng New People’s Army sa area sa South Cotabato.
Saysay man usab ni Limson nga usa rason nganong daghan nang mga NPA nga mitahan sa gobyerno gumikan kay gusto na nilang manginabuhi nga dunay kalinaw kauban ang ilang pamilya.
Gipaniguro man usab ni Police Colonel Joel Limson nga dunay madawat nga tabang gikan sa gobyerno ang mga rebeldeng New People’s Army nga mag surrender nga sumala pa niini nga matag uniform ug armas nga ilahang gisurender dunay bayad nga kwarta gikan sa gobyerno.
Dugang asoy sa opisyal nga gawas sa kwarta nga ilahang madawat duna poy balay nga ihatag alang sa temporaryo nilang kapuy-an samtang ginaproseso pa ang mga dokumento aron mamahimong legal ang ilang pagsurender ug aron usab maplanohan kung unsa pang tabang nga madawat gikan sa gobyerno.
Pagpaklaro usab ni Limson nga usa sa ilang ginatutukan nga lugar nga duna pay presensiya sa NPA ang boundary sa Tampakan, Lake Sebu, Surallah, Tupi ug Tboli nga kasamtangan nagpadayon ang operasyon sa militar sa kabukiran. (Reynald Timario)
