Davao City – Gika alarma karon sa Talikala Incorporated ang nagkataas nga ihap ug nagka bata nga nalambigit diha sa prostitusyon partikular na dinhi sa Davao City.
Sa interbyu sa DXDC RMN Davao kang Carina Sajonia, Program Coordinator sa Talikala Inc. – Davao City, gikumpirma niini nga sa pagsugod sa bulan sa Hunyo karong tuiga hangtud ning panahon sa atong pagsibya, anaa sa 20 ka mga menor nga nag edad og 13 hangtud 17 anyos ang nalambigit sa pagbaligya sa ilang dungog.
“Naga increase unya nagka bata ang nalambigit. Kana ang among problem. Dili gyud mi malipay nga maka kuan na pud mi og bata, musakit among dughan,” saysay ni Sajonia.
Gikumpirma ni Sajonia nga ilang gitawag nga ‘freelance’ ang maong mga menor nga makita sa mga “crossing sites” sa syudad kung asa naga adto ang ilang mga customers.
Segun ni Sajonia nga nag-unang rason sa mga menor nga nalambigit sa maong trabaho mao ang panagbulag sa ginikanan rason nga wala na sila naatiman o kaha sila kadtong breadwinner o maoy nagbuhi sa ilang pamilya.
Lig-on usab nga pakig-koordinar sa Talikala Inc. ngadto sa Department of Social Welfare and Development (DSWD) ug City Social Services and Development Office (CSSDO) aron sa pagtabang sa mga bata nga maoy nag-unang tumong sa organisasyon.
RadyoMaN Kirby Manzon
