Gibuksan adtong Miyerkules, June 9, 2021 ang ika-118 nga Malasakit Center sa nasud sa Bukidnon Provincial Hospital kon BPH-Maramag.
Mismong si Senador Christopher Lawrence “Bong” Go nga maoy nagsugod sa Malasakit Center ang mitambong ug nanguna sa launching sa mao nga pasilidad.
Kini ang pinaka unang hospital sa Bukidnon ang gibutangan ug Malasakit Center.
Matud ni Bong Go nga tungod ninii, mapadali na para sa mga pasyente ang pagpangayo ug tabang gikan sa mga ahensiya sa gobyerno.
Gibutyag ni Sen. Go nga naggahin ug 3 Milyones ka pesos matag bulan nga pondo si President Duterte alang sa Malasakit Center sa Bukidnon. Samtang ang iyang opisina nigahin ug 20 milyon ka pesos diin una na niya gitunol ang 10 milyon samtang ang dugang 10 milyon karung bulan sa Agosto niya mahatag.
Samtang sa interview sa RMN DXMB Malaybalay ngadto kang Dr. Edmundo Garcia, ang chief of hospital sa BPH-Maramag gibutyag niini nga ang Malasakit Center usa ka one-stop-shop para sa mga indigent nga nanginahanglan ug tabang para sa ilang pagpatambal.
Ayha nga muadto pa ang pasyente sa mga opisina sa nagkadaiyang lugar, sa usa ka lugar na lang ang iyang kinahanglan duolan para sa ayuda sama sa DSWD, Philhealth, DOH ug PCSO.
Matud pa ni Dr. Garcia nga sa BPH Maramag gibutang ang Malasakit Center sa Bukidnon tungod kay nakit-an nga daghang ang mga pasyente sa mao nga hospital ug kulang ang ilang mga medical equipment.
