Ikaduhang batch sa mga residenteng IDPs, nagsugod na sa pag repair sa ilang mga balay nga naguba atol sa Marawi Siege

24

Natugtan niadtong Lunes, Enero 20, ang 67 ka mga pamilya nga magsugod na sa pag-repair sa ilang mga balay sulod sa Barangay Tolali sa sector 2 sa gikonsiderang most affected area sa Marawi City.

Kini nga mga balay sakop sa 250 thousand hectares, nga gilangkuban sa 24 ka mga barangay, kung asa nahitabo ang lima ka bulan nga giyera sa gobyerno batok sa Islamic militants nga ISIS niadtong 2017.


Nagpasabot kini nga aduna nay 87 ka mga pamilyang nahatagan sa ‘go signal’ sa Task Force Bangon Marawi nga makapatukod o kaha makapaayo sa ilang mga balay base sa gisaad sa gobyerno nga mahitabo niadto pa untang nakalabayng tuig.

Matud pa ni Mayor Majul Gandamra, adunay kapin kun kulang 4,000 ka mga legal homeowners o tag-iya og mga istraktura o balay ang kinahanglang mag-apply og building permit sulod sa MAA.

Adunay 1,493 ka mga homeowners ang nagpasa na sa ilang application kauban ang ilang kumpleto nga nga requirements, 433 na ang na-aprub.

Giklaro ni Gandamra nga hinay-hinay ang pagpasulod sa mga residente ug dili dungan aron dili gubot ang pagpahimutang kanila ug ma-monitor nga dili makatukod ang mga squatter sa lugar nga dili ilaha. (Divina M. Suson)

Facebook Comments