Sarangani Province–Isip paglab-as sa mga nahitabo atong bulan sa Abril, Mayo og Hunyo kabahin sa nagpadayon nga Year-End Review sa 2nd Quarter, daghang yanong katawhan ang naka-benipisyo sa Sulong Sarangani flagship program.
Hilabihan ang pagpasalamat sa transport sector nga STARTED kon Sarangani Transport Alliance for Reform and True Development ngadto sa liderato ni Governor Steve Chiongbian Solon. Sugod pa lang sa tuig apan dul-an 500 kabuok PUV driver-operator dayon ang nakapailalum sa Drivers’ Academy sulod sa Kapitolyo sa Sarangani. Mahinungdanon ang Drivers’ Academy tungod kay dili maka-renew sa prangkisa kung dili mupasar sa eksaminasyon subay sa kamanduan sa LTFRB.
Wala pud naulahi ang fishing sector. Mukabat sa singkwenta (50) kabuok payao ang libreng gipanghatag sa BFAR pinaagi ni Agriculture Secretary Manny Piñol para sa kahugpungan sa mga mananagat sa Sarangani, tag-P300 Thousand ka pesos ang kantidad sa matag usa ka payao. Dugay na matud pa nilang handum nga adunay exclusive fishing ground nga duol maadtuan sa mga gagmay’ng mananagat aron dili na ilegal nga managat sa nasud Indonesia.
Samtang, laing bisita ang niduaw sa Sarangani Province sa 2nd Quarter. Gitambungan mismo ni COA National Chairman Atty. Michael Aguinaldo ang inagurasyon sa bag-o nilang opisina sa Sarangani-Gensan Commission on Audit sulod sa Sarangani Capitol. Anaa pud sila Office of Transportation Cooperatives National Chairman Emmanuel Virtucio nag-assist sa kaayuhan sa transport sector sa Sarangani, Ilocos Norte Governor Imee Marcos sa iyang pag-adto sa inila na nga Sarangani Bay Festival, og si kanhing DENR Secretary Gina Lopez nga nagdala sa iyang G Diaries.
