Cauayan City – Hindi nakaligtas sa kamay ng mga kawatan ang ilang baterya ng truck sa Brgy. Nagrumbuan, Cauayan City, Isabela.
Sa nakuhang impormasyon ng IFM News Team, dalawang baterya ng truck ang tinangay ng hindi pa natutukoy na mga kawatan.
Ayon sa ulat, pinasok pa ng magnanakaw ang mismong compound ng isa sa mga biktima kung saan nakaparada ang truck nito at tagumpay nang nakuha ang baterya nito.
Samantala, hindi naman natukoy kung anong araw natangay ang baterya ng isa pang truck dahil saka lang umano napansin na nawawala ito ng gagamitin sana ng may-ari.
Dahil dito, pinapayuhan ng mga opisyal ng barangay ang mga residente na isiguro ang lahat ng kanilang mahahalagang kagamitan, tiyaking naka-lock ang kanilang mga tahanan, at kaagad na mag-report sa kanilang tanggapan at sa mga awtoridad sakali man na may mapansing indibidwal na may kahina-hinalang kilos.
