Davao City – Posible nga mahatag karong adlawa ang financial assistance ngadto sa mga nasunogan sa Brgy. Ilang ning syudad sa Davao.
Subay kini sa pakighinabi sa DXDC RMN Davao sa usa sa mga personahe sa City Social Services and Development Office kun CSSDO nga si Gemma Algabrico didto sa gihimong evacuation area duol sa incident area, matud pa nahan-ay na ang validation ug gipasa na nila kini sa main office aron matunol na ang financial assistance.
Dugang pa nga adunay dawaton nga 10,000 pesos ang owners nga ang balay totally damaged samtang anaa sa 3,000-5,000 ang madawat sa uban pang apektado sa maong sunog.
Sa pagpanubay sa RMN Davao sa area, daghang apektadong residente ang buot na unta magtukod og payag-payag aron aduna silay kapuy-an busa naglaum sila nga makadawat na og pinansyal nga tabang ingon man uban pang hinabang nga magamit nila sa balay ilabi na school supplies sa mga apektadong mga estudyante.
Kahinumduman nga miulbo ang dakong sunog sa Brgy. Ilang kagahapon sa kadlawun, June 2, 2019 diin electrical related ang gilantaw sa Bureau of Fire Protection kun BFP XI nga hinungdan sa maong insidente.
RadyoMaN Renz Barbarona
