Mukabat sa halos 1,300 ang ihap sa mga nakatanggong karon sa Provincial Detention and Rehabilitation Center kon PDRC sa probinsya sa Bukidnon.
Sa interview sa RMN Malaybalay ngadto kang Provincial Jail Warden Allan Gurrea, gibutyag niini nga ang mao nga ihap gawas pa sa ilang napadala ngadto sa Department of Health nga muabot ug 150 kapin kon kulang nga nakapahimulos sa programa nga rehabilitation program alang sa mga adunay kaso kalabot sa illegal nga droga.
Matud ni Gurrea nga adunay bag-ong programa ang Supreme Court nga gitawag ug plea bargaining kung asa ang usa ka akusado sa droga, ipa-angkon kini nga guilty sa usa ka particular nga kaso ug katugbang sa pag-angkon hatagan kini ug programa sa DOH ug korte diin i-rehab sulod sa 18 ka bulan.
Apan sigun niini nga bisan pa man nga nakuhaan ang naka-detain sa PDRC apan nagpabilin pa gihapon ang congestion.
Gidugang pa ni Gurrea nga nag-unang kaso nga gi-atubang sa mga naka-detain karon sa PDRC mao ang kalambigitan sa illegal nga droga, ikaduha ang kasong pagpatay ug ikatulo ang kasong pagpanglugos.
