Sarangani Province—Padayon pa karon ang gihimong imbistigasyon sa Maitum PNP kalabutan sa subling pag-operate na usab sa mga illegal miners sa nabukid nga bahin nga sakop sa Sitio Bugo, Barangay Malalag, Maitum.
Nasayran nga una nang nakadawat ug report ang Maitum PNP gikan sa mga concerned Citizen nga matud pa duna na usay mga personaheng nagkalot sa maong lugar aron mangita ug bulawan.
Tungod niini girespondihan sa tropa sa Maitum PNP sa pagpanguna ni Police Major Rodel Javison ang Hepe sa Maitum PNP.
Didto nakaplagan ang mga gamit sa pagmina sama sa Silsil, Bara, ug uban pang gakamitan. Wala hinuoy naabtang tawo sa lugar kansa gituohang nanibat human nakamatikod sa presensya sa kapulisan.
Sa karon padayon pang ginasuta sa kapulisan kung si kinsa ang nagpaluyo sa pagkalot sa maong lugar.
