Maga pulis del Divisoria Police Station ta imbestiga ahora el alegao incidente de illegal recruitment donde embuelto el un mujer quien ya collecta dinero desde consu maga victima con promesas manda canila sale para na America.
Na report del pulis ta aparese tiene maga 18 reclamante mesclao hombre y mujer el ya anda na estacion y ya hace reclamo contra con Gracielo Rosalado Rojas, 50, casao de Zone 8, Daisy Road, Guiwan.
Asegun con el maga reclamante si Rojas ya collecta canila dinero con differentes cantidad y ya promote canila manda sale para na America para trabaha na barco, na hotel, medical crew, bar tender y mucho pa otro trabaho.
Pero asegun despues de dale sila conel cen con Rojas nohay este puede compli su promesas.
Seguiendo con el reclamo del maga victima, el pulis ya tene que imbita con Rojas na estacion pero ya puede otravez este bolbe porcausa lampas na prescribed period para el inquest.
Asegun con pulis ay planta el caso de swindling/estafa con Rojas por medio del normal filing procedure.
