Davao City – Gibutyag ni Department of Public Works and Highways (DPWH-XI) Regional Director Allan Borromeo nga napuno og illegal settlers ang La Verna Hills, Bajada, Davao City, diin mao kini ang usa sa hinungdan sa grabeng pagbaha.
Subay kini human gikwestiyon ni Davao City 2nd District Councilor Danilo Dayanghirang ang maong ahensiya human adunay grabeng pagbaha sa maong lugar.
Gipasabot ni Borromeo, adunay natural nga lawa ang lugar sa La Verna Hills diin mupaingon sa kadagatan apan naharang kini gumikan sa mga illegal settlers sa naasoy’ng lugar.
Gani nagpatabang ang DPWH nga studyohan ang maong lugar ug makigkoordinar sa konseho aron nga masolusyonan ang maong problema.
“Ato sa i-address ang illegal settlers sa dili pa ta magpa-implement,” segun niini.
Dugang sa Regional Director sa DPWH-XI, mamahimo nga i-elevate ang kadalanan sa La Verna apan gikinahanglan ikunsidera ang mga illegal settlers nga dili mabutang sa delikado.
Sa pagkakaron, magpulong sila si RD Borromeo ug Councilor Dayanghirang aron mas mapalambo ug masolusyonan ang maong hisgotanan.
RadyoMaN Jason Amisola
