RMN LAOAG — Nagtalinaed ti kinakapia ken talna iti probinsiya ti Ilocos Norte manipud iti pangta ti terorismo nangnangruna ti New People’s Army (NPA).
Daytoy ti impakaammo ni Lieutenant Colonel Jearie Boy Faminial, commander ti 24th Infantry (Wildcat) Battalion ti Philippine Army bayat ti naisayangkat a Provincial Peace and Order Council (PPOC) ken Provincial Anti-Drug Abuse Council iti kapitolyo ti probinsiya.
Innayun pay ni Faminial a saan a karaman ti Ilocos Norte ti ‘insurgency list’ ti terorismo iti pagilian manipud tawen 2012.
Malagip iti naglabas nga aldaw, inatake manen ti grupo ti NPA iti plantasyon ti Pinya idiay Bukidnon rason a nagpungtotan ni Presidente Rodrigo Duterte.
Nupay kasta, saan a mailimed ti panagamak dagiti sumagmamano nga opisial iti probinsiya kangrunaanna iti daytoy ‘campaign period’ — posible nga aramatenda daytoy a pammutbuteng usar ti cellphone wenno ‘social media’.
Nakasagana met ti PNP mainaig kadaytoy.
Bernard Ver, RMN News
