ILOILO CITY – Handa si Congressman Jerry Treñas nga magpanaug sa puwesto bilang congressman sang siyudad sang Iloilo kon mapamatud-an nga may kahilabtanan siya sa illegal nga druga.
Ini ang pahayag ni Treñas angut sa ginbuyagyag karon ni Mr. Rommel Ynion nga may koneksyon siya sa napatay nga anay drug lord nga si Melvin Odicta kag gintuyo niya nga ipapatay si kagawad Plaridel Nava.
Ginpanginwala ni Treñas nga plano niya ipapatay si Nava bangud wala man siya sang kaakig diri kag iya man ginpanginwala nga kilala niya si Odicta.
Ginhatagan pagtamod ni Treñas nga kon may ebidensya nga makapamatuod sang nasambit nga mga akusasyon nanday Ynion kag Nava indi siya mangduha-duha nga magresign kag indi siya manghawid sa iya posisyon.
Nagapati ang kongersista nga politika lamang ang rason sa nasambit nga akusasyon ni Ynion.
Una diri, ginkuwestyon ni Ynion kon nga-a si Mayor Jed Patrick Mabilog lamang ang yara sa narco list sang presidente kag wala si Treñas apisar nga ini ang mas may direkta nga koneksyon kay Odicta.
Facebook Comments
