Report ni: Jennifer Palomo Debaja
Isa naman ka Ilongga ang nasapwan patay sa isa ka poluy-an sa California, USA kaupod ang bangkay sang isa ka lalaki sang Marso 6, 2019.
Ginkilala ang biktima kay Ana Marie Alba, 39 anyos sang Pototan, Iloilo kag isa ka federal contractor sa US, samtang ang lalaki naman ginkilala kay Johny Tu.
Base sa imbestigasyon sang kapulisan sa California, ginapatihan nga kaso sang “murder-suicide” ang natabo apang wala pa matul-id kon sin-o sa duwa ang ginpatay kag kon sin-o naman ang naghikog.
Napatigayon naman sang isa ka fundraising paagi sa “go fund me” ang mga himata, kaabyanan kg kaupod sa trabaho sang Ilongga.
May ara nga bay area viewing kg memorial rosary sang iya bangkay sa Duggans Mortuary sa Daly City antis ini pagadal-on sa airport para sa katapusan nga biyahe pauli sa Pilipinas.
Nakaskedyul ang pag abot sang bangkay sini sa Iloilo subong nga semana.
Nagpalab-ot naman sang tuman nga pag pasalamat ang utod sang Ilongga sa tanan nga nagbulig agud mapapauli ang bangkay sini sa Iloilo.
Si Ana Marie ang may duwa ka kabataan nga naga edad katorse kag onse anyos.
