Iloy, nagbata sa sulod sang nagadalagan nga traysikol sa Barotac Viejo

199

Wala na nakalab-ot sa hospital ang nagabusong nga iloy kag sa nagadalagan na lang nga traysikol ginbun-ag ang anak nga lalaki pasado alas 11:00 kagab-i, Hunyo 11.

Ginkilala ang iloy kay alyas Tikay, ginabulubanta 40 anyos kag residente sang Aripdip , San rafael , Iloilo.


Suno kay Jun Lumabit, driver sang traysikol, nagabyahe na sila padulong sa Barotac Viejo District Hospital bangud manugbata na ang iya pakaisa apang sa bahin pa lang sang brgy. San Lucas, Barotac Viejo, naggwa na ang lapsag bangud sang undag sang traysikol.

Iya na lang ginpanugyanan si Tikay nga sapnayon ang lapsag agud indi mawigit .

Yara na sa maayo nga kahimtangan si Tikay kag ang iya ika-anum nga anak.

Nahibaluan nga naglahog pa ang mga nurses sang hospital nga pangalanan nga ‘Traysi’ ang lapsag bangud sa traysikol ini ginbun-ag.

Ginakabig naman ni Lumabit nga swerte ang iya traysikol .

(photo from the web)

Facebook Comments

From Advertisers