General Santos City–Gihatagan na ug direktiba ni Police Regional Office-12 Regional Director Police Brigadier General Michael John Dubria si Police Colonel Jemuel Siason ang Provincial Director sa South Cotabato Police Provincial Office nga mas pahugtan pa ug palawman ang imbestigasyon sa nahitabong pag-ambush patay sa driver sa DOJ nga si Richard Escovilla ug pagka-angol sa tulo ka mga sakay niini.
Matud pa ni Police Lieutenant Colonel Lino Capellan, tigpamaba sa PRO-12 nga usa sa biktima nga sakay ang witness sa Maguindanao Massacre, asa mao karon ang ginasuta sa kapulisan kung dunay kalambigitan sa krimen.
Kahibaloan nga gideklarang dead on arrival ang driver tungod sa naangkong samad pinusilan sa lawas ug ulo samtang samdan usab ang tulo ka mga sakay nga kasamtangan anaa na sa maayong kondisyon nga nagpa-alim sa ospital.
Gipaklaro usab ni Lieutenant Colonel Capellan nga sa pagkakaron wala pa silay person of interest ug gipaninguro niini nga himoon sa kapulisan ang tanan aron mahatagan ug hustisya ang mga biktima.
Gimando usab ni PNP-12 Regional Director Dubria ngadto na sa kapulisan sa South Coptabato nga tutukan ug maayo ang pag imbestiga sa panghitabo aron masuta si kinsa ang mga suspek ug ang nagpaluyo sa krimen.
Pamahayag man usab sa opisyal nga apil sa gipatutukan ni General Dubria ang kapulisan nga anaa sa Provincial ug Municipal level aron nga sa daling panahon maresolba ang kaso sa pagpamusil sa mga biktima.(RV)
