IMBESTIGASYON | Special Investigation Task Group, gintukod agud matutukan ang imbestigasyon sa pagluthang-patay kay Punong Barangay Elvis Asis

651

Roxas City, Capiz – Nagtukod na sang Special Investigation Task Group (SITG) ang Capiz Police Provincial Office sa pagpanguna ni Police Senior Superintendent Samuel Nacion agud nga mag-imbestigar sa pagluthang-patay kay Barangay Kapitan Elvis Asis sang Barangay Lawaan, Roxas City.
Pagapamunuan ni Police Superintendent Dante Tayco, hepe sang Roxas City PNP ang nasambit nga task group kaupod ang mga imbestigador. Ginpahayag ni Tayco nga pinakauna nga tikang sang task group nga magpangita sang pila ka mga nakasaksi sa pagpatay kay Kapitan Asis. Magapadulong man ang mga ini sa pila ka mga establisemento nga may CCTV camera nga malapit sa ginluntaran sang insidente agud makabulig sa ila imbestigasyon.
Nagapati si Tayco nga planado ang pagpatay sa biktima kag madugay na ini ginabantayan sang mga suspek. Suno pa diri nga malapitan ang pagluthang sa biktima, kag ginsiguro sang mga suspetsado nga indi na ini mabuhi bangud sa naangkon nga mga patal nga pilas sang biktima. Sa madumduman nga nagluntad ang pagluthang-patay kay Kapitan Asis sang nagligad nga adlaw sang Byernes alas 8:20 sang gab-i samtang ini ang nagasakay sa motorsiklo upod sa iya nga driver sa Kilometer 2, sakop sang Barangay Lawaan, syudad sang Roxas.
Nag-angkon sang igo sang bala sa tangkugo si Kapitan Asis kag nag naglapus pa ini sa iya nga guya. May mga igo man ini sang bala sa iya likod kag abaga tuga sang pagpangluthang sang mga suspek nga riding-in-tandem. Narekober sang mga pulis sa ginluntaran sang krimen ang apat ka empty shells sang .45 caliber pistol nga ginapatihan gingamit sang mga suspek sa pagluthang sa biktima.

Facebook Comments