General Santos City—Gibutyag ni Fire Chief Inspector Reginald Legaste ang labaw sa BFP-Gensan nga sa pagkakaron nagpadayon pa ang ilahang gihimong imbestigasyon sa nahitabong sunog sa may Purok Islam, Brgy.Dadiangas South kung asa dunay kapin gatos ka panimaly ang naugdaw ug usa ka bata ang napatay.
Sumala pa ni Legaste nga iyaha nang gihatagan ug instruction ang iyang mga ibestigador aron sayron pa ang ubang anggulo sa maong panghitabo gumikan sa kadako sa sunog ug gikinahanglan niini nga makakuha pa sila ug dugang impormasyon gikan sa mga residente.
Saysay man usab sa opisyal nga giadtoan sa iyang mga imbestigador ang evacuation center sa mga nasunugan aron ilahang kuhaan ug pamahayag sa posibleng mahimong witness aron masayran kung unsa gayud ang hinungdan sa sunog.
Gimahay usab ni Legaste ang mga residente sa maong panghitabo nganong wala dayon nakatawag sa ilahang buhatan hinungdan nga sa pagresponde sa mga bombero daku na ang kalayo nga ilang naabutan nga milamoy sa daghang mga kabalayan.
Pagpaklaro usab sa opisyal nga basi sa ilahang obserbasyon kaniadto sa nahitabong unang sunog sa lugar usa sa ilang nakita ang series connection sa kuryente sa mga kabalayan nga maoy hinungdan nga nag-overload kini ug nakamugna ug sunog.
