Lalakas ang tsansa na maiakyat sa Senate impeachment court ang impeachment case laban kay Vice President Sara Duterte kung hindi ito haharap sa gagawing impeachment hearing ng House Committee on Justice simula March 25.
Ayon kay Committee chairperson at Batangas Rep. Gerville Luistro, kung makakapagpresenta si VP Sara ng mga ebidensya kontra sa mga ebidensya ng mga complaints ay maaari niyang makumbinsi ang mga miyembro ng komite at ng buong kapulungan na ibasura ang kinakaharap niyang mga reklamong impeachment.
Diin ni Luistro, ang pagdalo ni VP Duterte sa impeachment hearing ay bahagi ng due process para mailahad ang kanyang panig at pabulaanan ang mga alegasyong nakapaloob sa kinakaharap na impeachment complaints.
Sabi naman ng miyembro ng komite na si Bicol Saro Party-list Rep. Terry Ridon, hindi maaring pilitin si VP Duterte na sumipot sa impeachment hearing.
Pagtitiyak naman ni Ridon, malinaw sa rules na mag-participate man o hindi si VP Sara ay magpapatuloy pa rin ang proceedings sa Committee on Justice na maikokonsiderang “mini trial” dahil ilalatag ng complainants at respondents ang kanilang mga ebidensya, dokumento at mga testigo.
