Davao City – Dili halayo ang posibilidad nga i-konsidera sa mga sakop sa Kabus Padatoon (KAPA) Community Ministry International, Incorporated ang pagsang-at og kasong impeachment batok kang Pres. Rodrigo Duterte kung ilang paminawon ang sugyot ni outgoing Sen. Antonio Trillanes IV.
Kini maoy giluwatang pangagpas karon ni Christian & Missionary Alliance Churches of the Philippines (CAMACOP) Minister Dr. Ira Lee Rosalita kinsa nagtoo nga dili gihapon kini makalusot sa hawanan sa Kongreso sanglit majority sa mga kongresista ug senador kaalyado man sa pamuno-nasud.
Labaw nang dili magsilbi ang pagpasaka og kasong class suit kang Duterte kay anaa pa kini sa poder ug mas maayong paabuton na lamang nga mahuman na ang termino, dugang sa pastor.
Walay mapadulngan ang duha ka bug-at nga mga kaso batok kang Duterte gawas sa pagbalibag niini ngadto sa basurahan sa kalimot hangtud mahuman ang termino sa lider sa nasud.
Sa laing bahin, gisaway ni Rosalita ang National Bureau of Investigation (NBI) ug Criminal Investigation and Detection Group (CIDG) tungod sa pamaagi sa pagronda ug panghakwat og mga kagamitan sa mga buhatan sa KAPA sa tibuok nasud.
Segun ni Rosalita, usa ka dakung sayop ang pamahayag ni Duterte nga gitawag niya nga usaka syndicated estafa ang operasyon sa KAPA nga unta wala pa ma’y kaso ug wala pay pinal nga desisyon ang korte gawas sa giluwatang aksyon sa Securities and Exchange Commission (SEC).
RadyoMaN Joel Viray
