Gikompiska sa mga personahi sa National Meat Inspection Service (NMIS) Caraga ang mokabat sa 136 kilo nga ulo sa imported nga karning baboy nga gi-display sulod sa meat section sa Langihan Public Market.
Sigun Dr. Leo Caduan, senior meat control officer sa NMIS Caraga nga naglusad sila ug sorpresang inspection sulod sa Langihan Public Market ug naaktohan sa ilang mga personahi ang duha ka mga stalls nga nag-display ug imported nga ulo sa karning baboy nga wala naka-frozen ug nakalapas sa meat safety standard.
Gikantar sa Executive Order No. 6 nga kinahanglan mamintinar ang bugnaw nga temperatura sa karni nga ibaligya sa merkado ilabina kung imported aron pabiling luwas kan-on sa mga konsumante.
Nagdumili sa pagbutyag sa pangalan sa meat stall ang opisyal sa NMIS tungod kay matud pa nagpadayon ang ilang imbistigasyon.
Sa karon gilubong ang nakompiska nga ulo sa karning baboy aron masiguru nga dili na kini makonsomo.
[image: karne.jpg]
