General Santos City—Nagbangutan ang inahan sa 14 anyos nga batang lalaki nga si alias Jhon, nga taga Riverside, Sto. Nino, Barangay Apopong human kining gidunggab patay sa wala pa mailhing suspetsado alas 10:45 ang takna kagabie.
Sumala sa inahan sa biktima nga si Grace Cayanong nga siya kampante lang nga anaa sa Internet Café duol sa ilang balay ang iyang anak.
Apan nakadawat nalang kini ug taho gikan sa mga barkada sa biktima diin misugilon kaniya nga kini nadunggaban. Gilayon kining nahidangat sa Mindanao Medical Center aron sayron ang kahimtang sa iyang anak apan dakong kadismaya ang iyang gibati human nga nagtinga na ang biktima dihang iyang naabtan human nakangkon ug grabeng samad dinunggaban.
Duda ang ginang nga posibling natripan lang ang iyang anak sa mga batang latagaw nga gasuroy sa ilang lugar.
Gibutyag pa sa nasangpit nga ginang nga wala sya nasayod kung duna bay giapilan nga grupo ang iyang anak tungod sa ilang balay man kini magpermi o dili ba kaha sa internet café nga duol sa ilang balay.
Nasayran nga nasulti pa sa biktima nga taga Purok Lanton, Barangay Apopong ang midunggab kaniya apan wala niini nabutyag ang pangalan sa suspek.
