Inahan sa 8 anyos na bata na naligsan-patay sa Brgy. Sabang, Surigao City may pagmahay sa suspek
Mipadayag sa ija pagmahay ngadto sa suspek sa pagkaligis-patay an inahan sa 8 anyos na bata sa Brgy. Sabang, Surigao City.
Sumaya pa ni Nenita Lisondra, an inahan sa namatay na bata na si Hershiey Lisondra, sakit para sa ija an taghimo nan suspek na si Sangguniang Bayan Member Rolando Madelo nan lungsod sa Tubod gumikan kay makalolooy an ija anak sa pagkabangga, tagbijaan ra. Tagpanhingusgan niini, bahala unta kon napatay an ija anak, si Madelo o nagsugo unta nan iban tawo para dad-on dajon ini sa hospital. Sija nahiubos sa taghimo ni Madelo kay kasakit sa nahimong kamatayon sa ija 8 anyos na anak, tagpangajo nila an hustisya sa panghitabo.
Hinoon tag-angkon niini, may P10,000 na taghatag ngadto sa ila an kampo ni Madelo isip tabang sa pipila ka panginahanglanon, tagpaagi ini sa Lisondra Clan. Tagtindugan ni Lisondra na may mga nakasaksi na si Madelo an nagmaneho nan Isuzu Bighorn SUV na may plate number YDX 314 sa dihang nahitabo an pagkaligis, gani nohunong pa ini sa unahan ug misenyas, namulong na dad-on an bata sa hospital.
Base sa pinakabag-o na impormasyon na nakuha nan RMN, nakapiyansa na nan P20,000 ngadto sa Korte si Madelo, ini human na nasang-atan nan kasong Reckless Imprudence Resulting to Homicide. Una na nagpa-admit isab ini sa isa sa mga hospital diri sa siyudad resulta sa pagtaas nan blood pressure.
