General Santos City–Hustisya ang singgit karon sa ginang nga si Mariana Bualan, inahan sa biktimang si Michael Yata Otucan, 22 anyos nga taga Rubi Compound, Barangay Lagao, Gensan kansa gipusil patay sa wala pa mailhing suspek kaadlawon niadtong Myerkules.
Una nang nakaplagang patay ang biktima sa Novitiate Compound nga nahimutang sa Barangay Lagao, sa usa ka concern citizen.
Sumala sa ginang nga una na silang nakadungog ug buto, wala nila kini panumbalinga apan dihang nakadungog ug report nga matud pa may napusilan nga residenti sa ilang lugar nakabati na siya ug kabalaka gumikan wala nakauli ang iyang anak.
Ila pang gipangita iyang anak apan wala nila makit-an, tungod kakunay man kining nagalakaw namasin ang ginang nga aduna lay giadtuan ang iyang anak apan alas 6:00 sa gabie niadtong hwebes, nakadawat sila ug impormasyon gikan sa kapulisan nga nakaplagang patay na ang iyang anak.
Wala usab kapugngi sa ginang ang paghilak dihang nahinabi sa Rmn Gensan human sa gidangatan sa iyang anak.
Gihingusgan niini nga unta kung may sala man ang iyang anak wala lang unta kini gipatay sanglit gidakop nalang ug gipapriso.
Bisag unsa pa kabug-at matud pa ang salaod nga nahimo sa iyang anak, walay katungod ang kinsa man nga siya yano lang patyon nga daw sama sa hayop. Panawagan nalang sa ginang sa kapulisan nga unta paspasan ang imbistigasyon sa kaso aron nga madakpan ang mga suspetsado.
