General Santos City—Nagpabilin sa kustudiya sa Police Station 4 ning dakbayan sa Gensan ang usa sa mga incorporator sa Alamco kon Alabel-Maasim Credit Cooperative human kining gisikop sa gipahigayong manhunt Charlie diin gi-served ang warrant of arrest sa kaso niini.
Giila ni Police Capt. Brent Ian Salazar, Hepe sa San Isidro Police Station ang dinakpan nga si BJ Kevin Daigdigan Mancao, nga residente sa Brgy. Apopong ning dakbayan sa Gensan. Alas 11:00 matud pa ang takna sa gabii dihang nakadawat sila ug impormasyon nga anaa sa Maasim ang nasangpit rason nga ilaha kining i-adtuan uban ang mga personahe sa Maasim Municipal Police Station.
Nadakpan ang nahisgutan sa Prk. 4, Brgy. Poblacion, Maasim Sarangani Province. Dugang pagbutyag ni capt. Salazar, nga andam matud pa si Mancao nga itudlo ang iyhang mga kauban gani gihingusgan niini nga nadamay lang kini sa maong kaso. Ang nasangpit ang nag-atubang ug ubay-ubay nga kasong syndicated estafa ug walay girekomendang pyansa. Sa karon, ginahulat nalang ang commitment order niini aron nga hingpit kining madala sa Gensan City Jail.(LVR)
