BACOLOD CITY – Nagpadulong na sa Police Station 1 ang ginikanan sang detainee nga ginaalegar naghikog kahapon sang aga sa sulod mismo sang detention facility sang amo nga estasyon.
Ang biktima nga si Ronald Tulib, 36 anyos ang edad, pumuluyo sang Brgy. Binagyuhan, Escalante City ang nasapwan na gid lamang pasado las 6 kahapon sang aga nga patay na kag may nakahigot nga tarpaulin sa iya liog sa sulod sang Women’s Detention Cell.
Antes sini, si Ronald ang gindakup pasado la 1 kahapon sang kaagahon sa Hernaez St., matapos ginreklamo nga nagmauy sang nahubog apang pila ka oras ang nakaligad, nasapwan na lamang ini nga patay kag ginaalegar nga naghikog.
Suno sa ginikanan sang biktima nga sanday Venancio kag Angelina Tulib, indi sila magpati nga mahikog ang ila bata bangud indi man matuod ang ginahambal nga rasun nga naglain ang buot ni Bebot, bangod sa kamatayon sang iya lola, bangod wala sang lola nga napatay.
Nag-request na sang kopya sang blotter ang ginikanan sang biktima kag hulaton nalang nila ang report sang Scene of the Crime of the Operatives (SOCO).
Sa exclusive interview sang dyHB ginpahayag sang iloy nga si Angelina nga mabuot ang ila bata kag nagapadala pa gani sang kwarta sa ila halos kada bulan.
Ila ginkakibot ang kamatayon bangod imbis nga for safekeeping, napatay pa ang ila bata pagkaaga, Pebrero 15.
