BINALBAGAN – Naglab-ot sa 150 ka pamatan-on nga mga katapo sang Indigenous People (IP) ang nagtipon sa banwa sang Binalbagan.
Ini ang nagikan sa nagkalain lain nga Indigenous People’s group sa bug-os nga Pilipinas para maghiwat sang Dungog 2018: Indigenous People Youth Leadership Program.
Ang mga nagpasakop amo ang Ibaloy ukon Igorot gikan sa Baguio kag Benguet, Higaonon gikan sa Bukidnon, T’Boli sang Lake Sebu, Waray/Abaknon sang Samar kag Leyte lakip man ang Molbog/Palawani/Jama Mapun/Tagbanua/Pala’wan sang Palawan, Agta/Dumagat sang Nakar Quezon, Boholano/Cebuano sang Bohol, Ilongo/Hiligaynon/Kinaray-a/Aklanon sang Panay, kag Negros, Sulod/Panay Bukidnon sang Calinog IloIlo, Rombloanon/Tagalog sang Romblon, Ati sang Antique kag Malay Aklan, Ati sang Capiz,Iloilo kag Guimaras kag Ati sang Negros Occidental.
Tinutoyo sang sini nga pagtipon amo ang pagpasanyog pa gid sang kultura kag tradisyon sang tagsa ka mga tribu sa bug-os nga Pilipinas.
Ang kahiwatan ang lubos naman nga ginsuportahan ni Commissioner Alphonsus Tesoro sang National Commission for Culture and the Arts (NCCA).
Suno kay Tesoro nga ang tanan nga mga kagastuhanan sang mga partisipanti halin sa ila puluy-an tubtob nga nakalab-ot ini sa Binalbagan ang ginsabat sang NCCA bangod paagi sini nga hilikuton mas mapasanyog pa gid ang ginhalinan nga kultura sang mga Pilipino.
Sa pihak nga bahin, lubos naman ang pagsuporta sang banwa sang Binalbagan sa sini nga aktibidades sa pagpamuno sang alkalde sang Binalbagan nga si Mayor Emmanuel Aranda.
Ang Dungog: IP youth Leadership Program nga nagsugod sadtong Pebrero 1 kag magatakop naman ini sa Pebrero 5 paagi sa paghiwat sang Bulusan Festival ukon ang pagpakita sang mga tradisyon sang mga Indigenous People lakip man talento sa pagsaot kag iban pa./ Grace Supe photo
