Sarangani Province–Laing industriya karon ang nikusog sa SarGen kon Sarangani Province og General Santos City gawas sa hisgutanang panagat. Kini mao ang prodaksyon sa pasayan. Una nang gikumpirma sa SarGen Shrimp Stakeholders Association nga sa entiro Pilipinas, saysenta (60) porsyento sa suplay sa pasayan ang naggikan sa Sarangani og Gensan.
Gani karong adlawa, sa pag-organisa sa SarGen Shrimp Stakeholders Association, magsugod ang duha (2) ka adlaw nga pagpahigayon sa ikaduhang Mindanao Shrimp Summit sulod sa usa ka dakong mall sa Gensan aron padayon nga magkahugpong ang mga shrimp operators og shrimp growers dili ra sa Sarangani og Gensan kundili sa tibuok Mindanao.
Sa habig sa Sarangani Province, gibutyag ni Ms. Melbie Daguro, ang investment officer ilalum sa opisina ni Governor Steve Chiongbian Solon, naka-posisyon matud pa karon ang Sarangani nga maoy mahimong “Shrimp Capital of Region 12” tungod kay major producer og nidaghan na ang mga shrimp ponds sa probinsya, partikularminte ang pagbuhig mga vannamie kon white shrimp.
Sa ilang talaan niaging bulan sa Setyembre 2018, niabot na sa 800 ka ektaryang luna ang nabutangan og shrimp farm sa entiro Sarangani. Ang General Santos City ang anaa sa mga 480 ka ektarya. Mga anaa pud sa onse (11) ka mga kumpanya ang Gensan, samtang sa Sarangani niabot og baynte-kwatro (24) kabuok. Pipila sa mga dakong kumpanya nga nag-negosyog pasayan sa Sarangani Province mao ang RD Corporation, Alsons, SAFI og ang Eastern Aqua Ventures.
