Davao City – Nagpabilin gihapong dakung problema ang walay ngipon nga balaud labi na sa aktwal nga implementasyon niini sama na lamang sa problema sa basura nga muresulta unya sa polusyon sa kinaiyahan.
Sa pakighinabi sa DXDC RMN Davao kang Betty Cabasarez, focal person sa Kinaiyahan Foundation, gisaysay niini nga gawas sa problema sa implementasyon, ang kinaiya kun attitude usab sa katawhan nga walay pagpakabana ang makapasamot sa maong problema.
“Ang Pilipinas daw mura’g daghan kaayo’g maayo kaayo nga balaud, pero mas problema gyud ang implementation. Unya siguro pud ang attitude sa mga tawo nga walay pakialam, kana ang makapasamot sa poor implementation sa balaud,” pagpatin-aw ni Cabasarez.
Angay lamang sumala pang atubangon ug hatagan og solusyon ang maong problema labi na nga daku ang negatibong epektong ihatud niini sa tawo ug sa mga kahayupan sama na lamang sa kamatay sa mga hayop sa kadagatan kun sea creatures tungod sa nakaon niining mga basura ilabi na mga plastics, cellophanes ug uban pang materyales gitawag nga ‘non-biodegradables.’
Dugang pa sa opisyal nga kung dili makat-on ang katawhan sa pag-atiman sa kinaiyahan, muabot gayud ang panahon nga musumbalik ra gihapon sa tawo ang dili maayong epekto sa maong pagpasagad ug walay pagtagad sa atong palibot ug sa atong kalikupan.
RadyoMaN Kirby Manzon
